⁠"Май сэрца як мага чысцейшае і аддавай паслугі зямлі і людзям..." 

Эліза Ажэшка

...з гісторыі стварэння адзінага ў сваім родзе музея...

       Літаратурна-краязнаўчы музей вёскі Мількаўшчына быў адкрыты ў 2004 годзе на базе яшчэ дзеючай у той час установы адукацыі "Мількаўшчынская базавая школа імя Элізы Ажэшкі". На самой справе, з 2004 года ва ўстанове адукацыі пачынае працаваць толькі музейны пакой пад назвай “Беларуская хатка”. Кіраўніком музейнага пакоя быў вызначаны настаўнік гісторыі Савянкова Таццяна Анатольеўна.

    Але ў хуткім часе, праз некалькі гадоў існавання музейнага пакоя і плённай працы кіраўніка колькасць прадметаў музейнага пакоя значна павялічалася. Таму ў 2010 годзе на падставе рэкамендацый аддзела адукацыі Гродзенскага райвыканкама было вырашана перайменаваць музейны пакой у музей з літаратурна-краязнаўчым профілем.

       На жаль, з 2013 года ўстанова адукацыі "Мількаўшчынская базавая школа імя Элізы Ажэшкі" назаўсёды зачыняе свае дзверы перад вучнямі. З гэтага года школа перастае існаваць. Але жыццё ў яе сценах не спыняецца, а працягвае бурліць і кіпець. Дзякуючы актыўнасці загадчыка літаратурна-краязнаўчага музея - Таццяны Анатольеўны - і жыхароў вёскі, не абыякавых да лёсу былога культурнага цэнтра, будынак школы працягвае прымаць гасцей не толькі з Прынёмання, але і з усёй краіны і, нават, з замежжа.

      Сярод разнастайных раздзелаў экспазіцыі трэба вызначыць асноўныя: “Каралева жывога слова”, “Быў храм дзяцінства незабыўны”, “Шляхі і лёсы Мількаўшчыны і яе людзей”, “Шляхецкі пакой мінулых стагоддзяў”, “Свет побыту былога” і “Літаратурная гасцёўня”.